Martin Odegaard beson se dështimi i Arsenalit për të fituar Ligën Premier sezonin e kaluar do ta ndjekë atë për aq kohë sa të jetë gjallë.

Skuadra e Mikel Artetës kryesoi tabelën për shumicën e fushatës dhe dukej se do t’i jepte fund pritjes së tyre 19-vjeçare për titullin.

Por dështoi në javët e fundit të sezonit pasi fitoi vetëm tre nga nëntë ndeshjet e fundit, duke lejuar Manchester City t’i kapërcejë ata dhe të fitojë titullin e tretë radhazi.

Odegaard ende nuk e ka vënë gishtin në atë që shkoi keq dhe ka pranuar se ka qenë e vështirë të pajtohesh me kolapsin e skuadrës së tij.

“Është e vështirë, ka shumë gjëra që hyjnë në lojë, sigurisht”, tha Odegaard për Viaplay kur u pyet për të shpjeguar pse Arsenali humbi formën në një pikë vendimtare të sezonit.

“Kemi konkurruar kundër skuadrës që i ka fituar të gjitha, ishte e ngushtë dhe madje në fund, veçanërisht në tre ndeshjet [që Arsenali barazoi], ne humbëm momentin. Ka shumë gjëra që mund të ndikojnë në sezon, ne ishim afër dhe duhet të shfrytëzojmë zhgënjimin për t’u afruar. Mendoj se kjo do të më shqetësojë për pjesën tjetër të jetës sime”, shtoi ai.

Odegaard dëshiron që zhgënjimi i sezonit të kaluar t’i nxisë Topçinjtë në përpjekjen e tyre për të shkuar më mirë vitin e ardhshëm.

Arsenali e nis fushatën e tij në shtëpi kundër Nottingham Forest më 12 gusht dhe do të ketë shanse për të provuar kredencialet e tyre për titull pasi pret Manchester United, Tottenham dhe City në tetë ndeshjet e tyre të para./Arbresh.info/